സോൾഷ്യെയറെ പുറത്താക്കി മാഞ്ചസ്റ്റർ യുനൈറ്റഡ്
ഇംഗ്ലീഷ് പ്രീമിയർ ലീഗിലെ ദയനീയ തോൽവികൾക്ക് പിന്നാലെ മുഖ്യപരിശീലക സ്ഥാനത്തുനിന്ന് ഒലെ ഗണ്ണർ സോൾഷ്യെയറെ മഞ്ചാസ്റ്റർ യുനൈറ്റഡ് പുറത്താക്കി. കഴിഞ്ഞ ഏഴ് മത്സരങ്ങളിൽനിന്ന് ഒരു വിജയം മാത്രമാണ് മാഞ്ചസ്റ്ററിന് നേടാനായത്. ശനിയാഴ്ച വാറ്റ്േഫാഡിനോട് 4-1നാണ് പരാജയം രുചിച്ചത്. ഇതോടെയാണ് സോൾഷ്യെയറുടെ പരിശീലനത്തിന് അന്ത്യമായത്. മുൻ മിഡിൽഫീൽഡർ മൈക്കൽ കാരിക്കിനാണ് താൽക്കാലിക ചുമതല.
ഒലെ ഗണ്ണർ സോൾഷ്യെയർ തന്റെ മാനേജർ സ്ഥാനം ഉപേക്ഷിച്ചതായി മാഞ്ചസ്റ്റർ യുനൈറ്റഡ് അധികൃതർ അറിയിച്ചു. 'ഓലെ എപ്പോഴും മാഞ്ചസ്റ്റർ യുനൈറ്റഡിൽ ഒരു ഇതിഹാസമായിരിക്കും. ഈ വിഷമകരമായ തീരുമാനത്തിൽ ഞങ്ങൾ എത്തിയതിൽ ഖേദമുണ്ട്. കഴിഞ്ഞ ഏതാനും ആഴ്ചകൾ നിരാശാജനകമായിരുന്നെങ്കിലും, ദീർഘകാല വിജയത്തിനുള്ള അടിത്തറ പുനർനിർമിക്കാൻ അദ്ദേഹത്തിന് സാധിച്ചു' -ക്ലബ് പ്രസ്താവനയിൽ അറിയിച്ചു.
തുടർച്ചയായ തോൽവികളെ തുടർന്ന് പ്രീമിയർ ലീഗ് കിരീടപ്പോരാട്ടത്തിൽ യുനൈറ്റഡിന്റെ സാധ്യതകൾ മങ്ങിയിട്ടുണ്ട്. ഒന്നാം സ്ഥാനത്തുള്ള ചെൽസിയെക്കാൾ 12 പോയിന്റ് പിന്നിലായി പട്ടികയിൽ ഏഴാം സ്ഥാനത്താണ്. ലീഗ് കപ്പിൽ നിന്ന് പുറത്താവുകയും ചെയ്തു.
സോൾഷ്യെയറുടെ കോച്ചിംഗ് ടീമിന്റെ ഭാഗമായിരുന്ന മൈക്കൽ കാരിക്ക് ചാമ്പ്യൻസ് ലീഗിൽ ചൊവ്വാഴ്ച വിയ്യാറിയലുമായി നടക്കുന്ന നിർണായക മത്സരത്തിൽ കോച്ചായി ചുമതലയേൽക്കും. വരും ആഴ്ചകളിൽ സ്ഥിരമായ നിയമനത്തിനു പകരം സീസൺ അവസാനം വരെ ഇടക്കാല കോച്ചിനെ നിയമിക്കാനാണ് തങ്ങൾ ശ്രമിക്കുന്നതെന്നും യുനൈറ്റഡ് അറിയിച്ചു.
