ബാങ്കിനേക്കാൾ കുറഞ്ഞ പലിശക്ക് സ്വർണ പണയ വായ്പ! പുതിയ കൊള്ളയുമായി 'ബ്ലേഡു'കാർ

കോഴിക്കോട്: സ്വർണ പണയവായ്പ അനുവദിച്ച് പലിശക്കെണിയൊരുക്കി സ്വകാര്യ ധനകാര്യസ്ഥാപനങ്ങൾ. ദേശസാൽകൃത ബാങ്കുകളിലേതിന് സമാനമായി കുറഞ്ഞ പലിശക്ക് സ്വർണ പണയത്തിൽ വൻതുക വായ്പ നൽകി നിശ്ചിത കാലാവധിക്കുള്ളിൽ പലിശ ഇരട്ടിയാക്കിയാണ് കെണിയൊരുക്കുന്നത്. ഏഴ് ശതമാനം പലിശക്കെടുത്ത വായ്പക്ക് ഒറ്റയടിക്ക് 12 മുതൽ 18 ശതമാനംവരെ പലിശ വർധിപ്പിക്കുന്നതോടെ ഈടുവെച്ച സ്വർണാഭരണം തിരിച്ചെടുക്കാനോ പലിശയടക്കാനോ കഴിയാതെ വെട്ടിലാവുകയാണ് സാധാരണക്കാർ. രണ്ടോ മൂന്നോ തവണ നോട്ടീസ് അയക്കുന്നതിന് പിന്നാലെ സ്വർണം ലേലത്തിന് വെച്ചുമാണ് വഞ്ചന.