നട്ടുച്ചയ്ക്ക് ഭൂമി ഇരുട്ടിലാകും; വരുന്നത് വിസ്മയം, ഇത്തരമൊന്ന് ഇനി ഈ നൂറ്റാണ്ടിൽ കാണാന് കഴിയില്ല!
സൂര്യനെ പൂർണ്ണമായും മറച്ച് ചന്ദ്രൻ ഭൂമിക്ക് മുന്നിലെത്തുന്ന ആകാശവിസ്മയത്തിന് സാക്ഷിയാകാൻ ലോകം കാത്തിരിക്കുന്നു. 21-ാം നൂറ്റാണ്ടിൽ ഇനിയൊരിക്കലും സംഭവിക്കാനിടയില്ലാത്ത അത്രയും ദൈർഘ്യമേറിയ പൂർണ സൂര്യഗ്രഹണമാണ് (Total Solar Eclipse) 2027 ആഗസ്റ്റ് 2-ന് വന്നെത്തുന്നത്.
കഴിഞ്ഞ മൂന്ന് പതിറ്റാണ്ടിനിടയിലെ ഏറ്റവും ദൈർഘ്യമേറിയ ഗ്രഹണമായിരിക്കും ഇതെന്നാണ് ശാസ്ത്രലോകം വിലയിരുത്തുന്നത്. ഈ അപൂർവ്വ പ്രതിഭാസം കാണാൻ ലോകത്തിന്റെ വിവിധ കോണുകളിലേക്ക് യാത്ര പ്ലാൻ ചെയ്യാൻ സഞ്ചാരികൾക്കും വാനനിരീക്ഷകർക്കും ഇതാണ് പറ്റിയ സമയം.
'നൂറ്റാണ്ടിലെ ഗ്രഹണം' എന്നാണ് ഈ പ്രതിഭാസത്തെ വിശേഷിപ്പിക്കുന്നത്. കാരണം, 2100 വരെ ഇനി ഇത്രയും ദൈർഘ്യമേറിയ ഒരു പൂർണ്ണ സൂര്യഗ്രഹണം ഉണ്ടാകില്ല. ഇതിന്റെ പാരമ്യത്തിൽ, ഏകദേശം 6 മിനിറ്റ് 23 സെക്കൻഡ് നേരം സൂര്യൻ പൂർണ്ണമായും മറയ്ക്കപ്പെടും. ഭൂമിയിൽ സംഭവിക്കാൻ സാധ്യതയുള്ള പരമാവധി ദൈർഘ്യത്തിന് തൊട്ടടുത്താണ് ഈ സമയം എന്നത് ഇതിന്റെ അപൂർവ്വത വർദ്ധിപ്പിക്കുന്നു.
താരതമ്യത്തിന്, 2024 ഏപ്രിലിൽ നടന്ന പൂർണ്ണ സൂര്യഗ്രഹണത്തിന്റെ പരമാവധി ദൈർഘ്യം 4 മിനിറ്റ് 28 സെക്കൻഡ് മാത്രമായിരുന്നു. സൂര്യന്റെ തിളങ്ങുന്ന ബാഹ്യവലയമായ 'കൊറോണ' സുരക്ഷിത ഉപകരണങ്ങളുപയോഗിച്ച് വ്യക്തമായി കാണാൻ ഈ സമയം ധാരാളമാണ്.
