പവന്റെ വില 1.20 ലക്ഷം രൂപയിലേയ്ക്ക്: ആഗോള വിപണിയിലും റെക്കോഡ്...
സ്വർണ വിലയിൽ മുന്നേറ്റം തുടരുന്നു. തിങ്കളാഴ്ച പവന്റെ വില 1,800 രൂപ കൂടി 1,19,320 രൂപയായി. അതായത് 1.20 ലക്ഷത്തിനരികെ. ഗ്രാമിന്റെ വിലയാകട്ടെ 225 രൂപ വർധിച്ച് 14,915 രൂപയുമായി. ഈ മാസം മാത്രം സ്വർണ വിലയിലുണ്ടായ വർധന 20,000 രൂപയിലേറെയാണ്.
ആഗോള വിപണിയിൽ ഇതാദ്യമായി സ്വർണം ഒരു ട്രോയ് ഔൺസിന് 5000 ഡോളർ പിന്നിട്ടു. ട്രംപിന്റെ നയങ്ങൾ സൃഷ്ടിച്ച അനിശ്ചിതത്വവും ഭൗമരാഷ്ട്രീയ സംഘർഷങ്ങളുമാണ് ഈ കുതിച്ചുചാട്ടത്തിന് പിന്നിൽ. സുരക്ഷിത നിക്ഷേപം എന്ന നിലയിൽ സ്വർണത്തിനുള്ള ഡിമാൻഡ് വർധിക്കുകയും ഡോളറിലുള്ള വിശ്വാസം കുറയുകയും ചെയ്ത പശ്ചാത്തലത്തിലാണ് ഈ വിലക്കയറ്റം. 2024 ജനുവരിയിൽ 2,000 ഡോളറിൽ നിന്നിരുന്ന സ്വർണ വില രണ്ട് വർഷത്തിനുള്ളിൽ ഇരട്ടിയിലധികമായാണ് വർധിച്ചത്.
റെക്കോഡ് കുതിപ്പ്
ആഗോള വിപണിയിൽ സ്വർണ വില ഔൺസിന് 5,026 ഡോളർ എന്ന റെക്കോഡ് നിലവാരത്തിലെത്തി. സ്വർണത്തോടൊപ്പം വെള്ളി വിലയും ഔൺസിന് 102 ഡോളർ എന്ന ചരിത്ര നേട്ടം കൈവരിച്ചു.
ഡിമാൻഡ് വർധന: കഴിഞ്ഞ വർഷം മൂന്നാം പാദത്തിൽ സ്വർണത്തിന്റെ ഡിമാൻഡ് മൂല്യം 44 ശതമാനം വർധിച്ച് 146 ബില്യൺ ഡോളറിലെത്തി.
നിക്ഷേപ രീതികൾ: എക്സ്ചേഞ്ച് ട്രേഡഡ് ഫണ്ടുകൾ (ETFs) വഴി സ്വർണത്തിൽ നിക്ഷേപിക്കുന്നത് വ്യാപകമായിട്ടുണ്ട്. ഇത് ഫ്യൂച്ചർ മാർക്കറ്റിൽ ഇടപെടാതെ തന്നെ സ്വർണ്ണത്തിൽ നിക്ഷേപം നടത്താൻ നിക്ഷേപകരെ സഹായിക്കുന്നു.
ട്രംപിന്റെ നയങ്ങളും ഗ്രീൻലാൻഡ് വിവാദവും
- ഗ്രീൻലാൻഡ് എന്ന ആർട്ടിക് ദ്വീപ് സ്വന്തമാക്കാനുള്ള ട്രംപിന്റെ താത്പര്യവും അതുമായി ബന്ധപ്പെട്ട പ്രസ്താവനകളും അന്താരാഷ്ട്ര തലത്തിൽ അനിശ്ചിതത്വം സൃഷ്ടിച്ചു.യൂറോപ്യൻ രാജ്യങ്ങൾ ഈ നീക്കത്തെ എതിർത്തതിനെത്തുടർന്ന് അവർക്കെതിരെ താരിഫ് ഏർപ്പെടുത്തുമെന്ന് ട്രംപ് ഭീഷണി മുഴക്കിയിരുന്നു.
- പിന്നീട് അദ്ദേഹം ഇതിൽ നിന്ന് പിന്മാറിയെങ്കിലും വ്യാപാര യുദ്ധ ഭീതിയും അമേരിക്കൻ നിക്ഷേപങ്ങളെക്കുറിച്ചുള്ള ആശങ്കകളും വിപണിയെ ബാധിച്ചു.
- അമേരിക്കൻ കേന്ദ്ര ബാങ്കായ ഫെഡറൽ റിസർവിന്റെ സ്വതന്ത്രമായ പ്രവർത്തനത്തിന്മേൽ ട്രംപ് ഭരണകൂടം നടത്തുന്ന ഇടപെടലുകൾ നിക്ഷേപകരെ ആശങ്കയിലാക്കി.ഫെഡറൽ റിസർവ് മേധാവി ജെറോം പവലിനെ ട്രംപ് നിരന്തരം വിമർശിക്കുകയും അദ്ദേഹത്തിന്റെ വിശ്വാസ്യതയെ ചോദ്യം ചെയ്യുകയും ചെയ്തു.
- പവലിനെതിരെ ക്രിമിനൽ കുറ്റം ചുമത്താൻ സാധ്യതയുള്ള വിധത്തിൽ അമേരിക്കൻ പ്രോസിക്യൂട്ടർമാർ നടപടികൾ സ്വീകരിച്ചത് ബാങ്കിന്റെ സ്വയംഭരണാധികാരത്തെക്കുറിച്ചുള്ള ഭീതി വർധിപ്പിച്ചു.
- ഡോളറിന്റെ മൂല്യത്തിലുണ്ടായ ഇടിവ് (യൂറോയ്ക്കെതിരെ നാല് മാസത്തെ ഏറ്റവും താഴ്ന്ന നിലയിലെത്തി.പണപ്പെരുപ്പം ഉയർന്ന നിലയിൽ തുടരുന്നത്.
- വിവിധ രാജ്യങ്ങളിലെ കേന്ദ്ര ബാങ്കുകൾ വലിയ തോതിൽ സ്വർണ്ണം ശേഖരിക്കുന്നത്.
